Þingeyjarskóli

Niðurstöður úr Svakalegu lestrarkeppninni eru komnar. Nemendur í 1. - 7. bekk Þingeyjarskóla tóku þátt og stóðu sig frábærlega og höfnuðu í 24. sæti af 106 skólum sem tóku þátt. Samanlagt lásu nemendurnir okkar í tæplega 30 þúsund mínútur, sem er sannarlega glæsilegur árangur hjá þeim. Umræðan hjá okkur í morgun var á þá leið að taka aftur þátt á næsta ári og stefna á að gera enn betur. Við erum afskaplega stolt af nemendum okkar. Takk kærlega fyrir stuðninginn við lestur barnanna heima.

Þegar nemendur á miðstigi fréttu að leggja ætti niður sjónvarspsþáttinn Kappsmál ákvaðu þeir að láta í sér heyra. Þeir skrifuðu dagskrárstjóra bréf þar sem þeir lýstu skoðunum sínum og færðu rök fyrir því að þátturinn ætti að halda áfram. Um leið fóru þeir í gegnum það hvernig bréf eru byggð upp og hvað greinir formleg bréf frá persónulegum. Þarna gafst gott tækifæri til að tengja námið við umræðuna í samfélaginu og sýna nemendum hvernig þeir geta komið skoðunum sínum á framfæri. 

Alþjóðlegur dagur læsis er í dag, 8. september. Af því tilefni var STÁSS stund í Þingeyjarskóla. Tónlistardeildin hóf daginn með nemendum og saman sungu þau nokkur íslensk lög. Að því loknu tóku nemendur og starfsfólk þátt í yndislestri þar sem allir settust niður, lásu í hljóði og nutu stundarinnar. Einnig gátu nemendur hlýtt á upplestur í einni stofunni. Læsi birtist með fjölbreyttum hætti í daglegu lífi okkar og nær meðal annars til lesturs, hlustunar, tals og ritunar. Við hvetjum nemendur og fjölskyldur þeirra til að gefa sér tíma til að lesa, ræða saman, hlusta og njóta tungumálsins. Slíkar stundir efla orðaforða, skilning og tjáningu og geta um leið veitt bæði gleði og ánægju.

Í vor var tekin sú ákvörðun að skipta úr námsumsjónakerfinu Mentor yfir í Námfús. Ástæða þessa er sú að það kerfi er í hinum skólunum í sveitarfélaginu og þykir ekki síðra en Mentor. Við fengum þó fyrst aðgang að kerfinu í dag 18. ágúst, þannig að við höfum ekki getað nýtt okkar það í undirbúningsvinnunni. Sá böggull fylgir skammrifi að það þarf að yfirfæra ýmsar upplýsingar s.s. nöfn og netföng aðstandenda yfir í nýja kerfið. Því miður var ekki hægt að taka þau beint útúr Mentor kerfinu þannig að við erum að handvinna þetta inn í kerfið. Í einhverjum tilvikum erum við ekki með netfangalista aðstandenda og erum að ráða bót á því.