Vegleg gjöf Sparisjóðs Suður Þingeyinga

Læsismánuður í Þingeyjarskóla tókst vel

Í febrúar lögðu nemendur og starfsfólk Þingeyjarskóla sérstaka áherslu á lestur og lestrartengda vinnu þegar skólinn stóð fyrir lestrarátaki undir yfirskriftinni Læsismánuður.

Markmið átaksins var að efla lestraráhuga, hvetja til aukins lesturs og skapa jákvæða umræðu um mikilvægi læsis í skólasamfélaginu. Nemendur tóku virkan þátt í fjölbreyttum verkefnum og áskorunum sem tengdust lestri, bókum og lestrarmenningu.

Óhætt er að segja að verkefnið hafi tekist mjög vel. Það var bæði ánægjulegt og hvetjandi að fylgjast með nemendum og starfsfólki taka þátt af krafti, lesa, ræða bækur og takast á við skemmtilegar lestrartengdar áskoranir.

Í tengslum við verkefnið færði Sparisjóður Suður-Þingeyinga skólanum veglega peningagjöf sem nýtt var til bókakaupa fyrir bókasafn skólans. Gjöfin mun styrkja bókakost skólans og nýtast nemendum vel til framtíðar.

Þingeyjarskóli þakkar Sparisjóði Suður-Þingeyinga kærlega fyrir þetta rausnarlega framlag og þá jákvæðni sem sparisjóðurinn sýndi verkefninu. Stuðningur sem þessi skiptir miklu máli og stuðlar að því að efla læsi, lestrargleði og fjölbreytta lestrarmenningu meðal nemenda.